Дастаи мунтахаби ҷавонон ба тайёрӣ оғоз кард

Душанбе, 14 май. ( АМИТ «Ховар», Аловиддин Бӯриев).- Таҳти роҳбарии Салоҳиддин Ғафуров дастаи мунтахаби ҷавонони ҷумҳурӣ(U-22) барои ширкат дар бозиҳои интихобии чемпионати Осиё тамринҳои худро оғоз карданд. Ба урдӯгоҳ се дарвозабон, 10 муҳофизатгар, 8 нимҳимоятгар ва 4 ҳамлагар даъват шудаанд. Асоси дастаро футболбозони дастаи «Вахш» (7 нафар), ССКА «Помир» (6 нафар) ташкил дода, ба он 3 нафар аз дастаи «Парвоз», дунафарӣ аз дастаҳои «Энергетик» ва «Регар-ТадАЗ» ва якнафарӣ аз «Хуҷанд», «Истаравшан», «Равшан» ва «Истиқлол» шомил шудаанд. Ёдрас мешавем, ки аз 23 июн то 3 июл ҷавонони мо дар гурӯҳи «С» бо дастаҳои Бахрайн, Эрон, Кувейт, Малдив ва Қатар дар Куала – Лумпури Малайзия бо ҳам қувва меозмоянд. Ду дастаи беҳтарин ба бозиҳои ниҳоӣ роҳхат мегирад.