Дастгирии таҷрибаи пешқадами хоҷагиҳои кишоварзӣ

Душанбе, 10 май. (АМИТ «Ховар», Дилшодаи Хайруллоҳ).-Дар Вазорати кишоварзии Ҷумҳурии Тоҷикистон ҷаласаи навбатии Шӯрои илмию техникӣ баргузор гардид, ки дар кори он роҳбарони хоҷагиҳои таҷрибавӣ, стансияҳои таҷрибавии Институтҳои зироаткорӣ, боғдорию сабзавоткорӣ ва чорводорӣ иштирок намуданд. Дар ҷаласа масъалаи гузаронидани мониторинги натиҷаи даромаднокӣ ва арзиши аслии истеҳсоли маҳсулоти кишоварзӣ дар шаклҳои гуногуни хоҷагидорӣ дар соли 2011 дар кооперативи истеҳсолии ба номи Алимурод Кенҷаев ва хоҷагии деҳқонии «Намуна-2005»-и шаҳри Ваҳдат мавриди баррасӣ қарор гирифт. Шӯрои илмию техникии вазорат тавсия намуд, ки таҷрибаи пешқадами ин хоҷагиҳо шоистаи дастгирӣ ва омӯзиши кишоварзони ҷумҳурӣ мебошад.Ҳамзамон зикр шуд, ки хоҷагии деҳқонии «Намуна-2005» бо истифода аз тавсияи олимону мутахассисони соҳаи кишоварзӣ соли 2011 ба натиҷаҳои баланди истеҳсолӣ ноил гардидааст. Ҳаҷми умумии даромади маҳсулоти кишоварзӣ дар хоҷагии мазкур 233 953 сомониро ташкил дод. Ҳамасола маҳсулоти истеҳсолкардаи хоҷагии мазкур ба нархҳои нисбат ба бозор арзон тавассути нуқтаҳои маҳсулотқабулкунии «Тоҷикматлубот» пешкаши харидорон мешавад.