Диде Дрогба «Челси»-ро тарк мекунад

Душанбе, 22 май. ( АМИТ «Ховар», Аловиддин Бӯриев).- Ҳамлагари дастаи «Челси» Диде Дрогба шартномаашро бо даста тамдид накарда, иттилоъ додааст.ки аз «Челси» ба дигар даста мегузарад,- менависад рӯзномаи France Football. Мӯҳлати шартномаи ин бозингар рӯзи 19 – уми май ба анҷом расидааст. Аз рӯи иттилои расонаҳо Дрогба ҳунарнамоии худро дар ҳайати дастаи «Шанхай Шенхуа» идома хоҳад дод. Дар он ҳоло ҳамдастаи ӯ Николя Анелка бозӣ дорад.Дрогба дар ҳайати «Челси» аз соли 2004-ум дар 339 бозӣ ширкат варзида, ба дарвозаи ҳарифон 157 гол задааст. Ӯ солҳои 2005, 2006 ва 2010 соҳиби унвони чемпионӣ, чор маротиба соҳиби Ҷоми Англия ва ду маротиба барандаи «Ҷоми лигаи англис» шудааст. Соли равон Дрогба дар ҳайати «Челси» ғолиби ҷоми чемпионҳои Аврупо гардид.