Эҳёи ҳунарҳои бадеии мардумӣ

Хоруғ, 7 май. (АМИТ «Ховар», Л.Додо ). – Шӯбаи фарҳанги ВМКБ барои иҷрои қарори Ҳукумати ҷумҳурӣ аз 31 октябри соли 2008 «Дар бораи тасдиқи барномаи рушди ҳунарҳои бадеии халқӣ дар Ҷумҳурии Тоҷикистон барои солҳои 2009 – 2015» кори зиёдеро анҷом додаст. Тавре мудири шӯъбаи фарҳанг Муҳиддин Пайшанбиев иттилоъ дод, дар шаҳру ноҳияҳо комиссияҳо таъсис ёфта, феҳрист ва рӯйхати ҳунармандони ҳунарҳои бадеии халқӣ таҳия шудааст. Имрӯз дар шаҳру ноҳияҳо ҳунарҳои мардумӣ пайваста ривоҷу равнақ дода мешаванд. Бо ин мақсад дастурҳои методӣ таҳия гардида, дастраси ҳунармандон гардонида мешаванд. Солҳои охир ба таъсиси ансамбҳои оилавӣ ва сабту ҳифзи оҳангҳои қадимаи мардумӣ низ аҳамияти хоса дода мешавад.