Фестивалҳои ансамблҳои оилавӣ

Хоруғ, 7 май. (АМИТ «Ховар», Л.Додо ). – Ба манзури баланд бардоштани ҳисси зебошиносии наврасону ҷавонон ва дарёфти истеъдодҳои нав ҳамасола моҳи апрел фестивал — озмуни умумиҷумҳуриявии ансамблҳои оилавӣ доир мегардад. Дар раванди ин дар толори литсейи касбӣ — техникии рақами 77 – уми ноҳияи Шуғнон даври сеюми фестивал — озмуни ансамблҳои оилавии ноҳияи мазкур баргузор гардид. Дар озмун оилаҳои ҳунарманд ва санъаткори ноҳия бо ҳунару истеъдоди волои худ ва такя бо расму оинҳои аҷдодии мардуми Бадахшон ҳунарнамоӣ карда, хотири аҳли толорро болида сохтанд. Фестивал — озмун таҳти унвони «Гули мақсуд» ба 15 – умин солгарди Ваҳдати миллӣ ва 20 — умин солгарди Иҷлосияи таърихӣ бахшида шуда, доир намудани он анъанаи некест, ки ҳанӯз аз аҳди шӯравӣ боқӣ мондааст. Фестивал дар се давра доир гардида ва даври ниҳоии он дар арафаи 15 – умин солгарди Ваҳдати миллӣ баргузор мешавад.