Филиали нави «Тоҷиксодиротбонк» дар Ховалинг

Душанбе, 21 май. (АМИТ «Ховар», Покиза Маҳмадбекова). — Бо мақсади таъмини хизматрасонии хуб ва муосири бонкӣ 19 майи соли равон дар ноҳияи Ховалинги вилояти Хатлон филиали нави «Тоҷиксодиротбонк» расман ифтитоҳ гардид. Ба мухбири АМИТ «Ховар» аз бонки мазкур иттилоъ доданд, ки бинои филиал тибқи талаботи муосири бонкдорӣ ва дар асоси бренди ягонаи бонк бунёд ва бо навтарин таҷҳизоти техникиву идорӣ муҷаҳҳаз гардидааст. Дар чорабинии кушоиши расмии филиал масъулини мақомоти иҷроияи ҳокимияти маҳаллии ноҳияи Ховалинг, роҳбарият ва кормандони «Тоҷиксодиротбонк», намояндагони Бонки миллии Тоҷикистон ва мардуми ноҳия иштирок намуданд. Дар ҷамъомад зикр шуд, ки фаъолияти филиал имкон медиҳад барои мутахассисони соҳавии ноҳия 30 ҷойи нави корӣ омода гардад, ҳамзамон бо истифода аз хизматрасониҳои бонкӣ барои пешбурди фаъолияти намояндагони соҳаҳои гуногуни ноҳия заминаи воқеӣ гузошта шавад.