«Гар дасти фитодае бигирӣ, мардӣ»

Душанбе, 23 май. (АМИТ «Ховар», Мавҷуда Анварӣ). – Дар шаҳри Қӯрғонтеппа миёни маъюбони вилояти Хатлон таҳти чунин унвон: «Гар дасти фитодае бигирӣ, мардӣ» телемарафон доир гардид. Телемарафон аз ҷониби Раёсати ҷавонон, варзиш ва сайёҳии вилояти Хатлон дар ҳамдастӣ бо шабакаи телевизиони вилоят созмон дода шуд.Тавре ки аз раёсати ҷавонон, варзиш ва сайёҳии вилояти Хатлон ба АМИТ «Ховар» хабар доданд, маблағе, ки аз ин чорабинӣ ҷамъоварӣ мешавад, барои ҳалли мушкилоти маъюбони вилоят равона мегардад.Ёдовар мешавем, ки дар айни замон дар вилояти Хатлон 11 ҳазор нафар ҷавони маъюб зиндагӣ мекунад, ки бо як силсила мушкилот, аз ҷумла мушкилоти таъмин бо ҷойи кор мувоҷеҳанд.