Худсарона ишғол кардани замин ҷиноят аст
Душанбе, 18 май. (АМИТ «Ховар», Мавҷуда Анварӣ). — Аз ҷониби кормандони ҳифзи ҳуқуқи шаҳри Чкалов шаҳрванд Шамсуддин Каримови 48 сола, сокини кӯчаи Краснознамённий дастгир карда шуд. Номбурда аз моҳи марти соли 2012 бе ягон ҳуҷҷати тасдиқкунанда 88-метри мураббаъи замини назди ҳавлии истиқоматиашро худсарона азони худ намуда, дар он ҷо таҳкурсии бинои истиқоматӣ сохтааст. Ҳамчунин ҳодисаи ба ин монанд дар ноҳияи Хуросон ба амал омад. Кормандони шӯъбаи корҳои дохилии ноҳия шаҳрванд Асомиддин Меликови 59- сола- сокини деҳаи Даҳанакиикро дастгир намуданд, ки номбурда моҳи майи соли 2012 дар ҳудуди деҳаи Правда аз ҳисоби заминҳои хоҷагии деҳқонии М. Асадуллоев бе иҷозати мақомоти дахлдор 0,10 гектар қитъаи заминро худсарона ишғол намуда, дар он ҷо хонаи истиқоматӣ бунёд намудааст. Нисбат ба дастгиркунандагон парвандаи ҷиноӣ оғоз гардидааст.