Иштироки Суди конститутсионии ҶТ дар конфронси Алмаато

Душанбе, 30 май. (АМИТ «Ховар», Лутфия Эшонқулова). – Чанде пеш дар шаҳри Алмаато конфронси минтақавӣ аз рӯи масъалаи татбиқи Конвенсияи Комиссияи иқтисодии Аврупо дар бораи дастрасӣ ба иттилоот, иштироки аҳли ҷамъият дар раванди қабули қарорҳо ва дастрасӣ ба адлия аз рӯи масъалаҳои муҳити зист корашро анҷом дод.Дар конфронс 75 нафар намояндагони мақомоти адлия, ҷомеаи шаҳрвандӣ ва коршиносони байналмилалии мамлакатҳои Осиёи Марказӣ ва Аврупо, ҳамчунин Муғулистон иштирок намуданд. Дар ҳошияи ин чорабинӣ барои судяҳо ва намояндагони Осиёи Марказӣ ва созмонҳои ғайриҳукуматӣ семинарҳои махсус созмон дода шуданд. Дар конфронс Ҷумҳурии Тоҷикистонро судяи Суди конститутсионӣ М.Гулзорова ва сармутахассиси бахши кори байни кадрҳои дастгоҳи Суди конститутсионӣ Ш.Холиқова намояндагӣ намуданд.Дар доираи конфронс мулоқоти намояндагони Суди конститутсионии Ҷумҳурии Тоҷикистон бо ҳамоҳангсозони Маркази рушди Швейтсария, намояндагони Қазоқистон ва Муғулистон баргузор гардида, зимни он масъалаҳои марбут ба фаъолияти низоми судӣ ва такмили қонунгузорӣ дар соҳаи экология мавриди муҳокима қарор гирифтанд.