Истеҳсоли ангишт зиёд гардид
Душанбе, 10 май. (АМИТ «Ховар», Дилшодаи Хайруллоҳ).- 3 корхонаи соҳаи ангишти Вазорати энергетика ва саноати Ҷумҳурии Тоҷикистон дар ҷамъбасти чор моҳи соли ҷорӣ (январ-апрел) ба комёбиҳои назаррас ноил гардиданд. ҶСШК «Ангишт», КФ «Фон-Яғноб», минтақаи «Ангишт»-и КМ «Анзоб» пурсамар фаъолият намуда, истихроҷи ангиштро ба 33 204 тонна расонида, нисбат ба нақша 10 104 тонна (143,7%) ва нисбат ба ҳамин давраи соли сипаригардида 11 268 тонна (151,3%) зиёд ангишт истеҳсол кардаанд. Дар давраи ҳисоботӣ 45 468 тонна ангишт ба фурӯш бароварда шуд, ки нисбат ба ҳамин давраи соли гузашта 23 480 тонна (206,8%) бештар аст. Воридоти ангишт то санаи 1.04. 2012-ум 5165,5 тоннаро ташкил медиҳад. Захираи ангишт (бо бақияи ангишт) назар ба соли гузашта дар анборҳо ва нуқтаҳои фурӯши ангишти корхонаҳои соҳа 35905 тоннаро ташкил дода, корхонаҳо мавсими истихроҷи ангиштро аз моҳҳои май-июн оғоз менамоянд. Содироти ангишт ба хориҷи кишвар тибқи фармоиши Ҳукумати Ҷумҳурии Тоҷикистон аз 30 апрели соли 2012 манъ шудааст. Дар айни замон 80 корхонаи хиштбарорӣ, 28 адад оҳангудозӣ, 6 адад корхонаи семент, як адад корхонаи шиша ва 21 адад корхонаи саноати хӯрокворӣ фаъолияташонро бо истифода аз ангишт ба роҳ мондаанд.Дар ин бора ба мухбири АМИТ «Ховар» аз котиботи Вазорати энергетика ва саноати Ҷумҳурии Тоҷикистон иттилоъ доданд.