Кӯмаки маҷҷонӣ ба геологияи Тоҷикистон

Душанбе, 7 май. (АМИТ «Ховар», Кристина Эрлих). – Дар ҷараёни гуфташуниди муваффақонаи сардори Сарраёсати геологияи назди Ҳукумати ҶТ Азими Иброҳим бо намояндагони ширкатҳои мухталиф, роҳбарони Намояндагии тиҷоратию иқтисодии ҶТ дар Британияи Кабир дар намоишгоҳи «Ҷаноби сармоягузор – 2012», ки дар шаҳри Лондон баргузор гардид, яке аз ширкатҳои Англия барномаи литсензиядори компютерии «Datamine» — и арзишаш баробари қариб 100 ҳазор доллари ИМА – ро ба таври маҷҷонӣ дастраси Сарраёсати геологияи Тоҷикистон намуд. Мақад аз ин барнома ҳалли масъалаҳои марбут ба иктишофу истихроҷи конҳои маъдан мебошад. Дар ин бора аз дафтари матбуоти Сарраёсати геология ба хабарнигори АМИТ «Ховар» хабар доданд.Мувофиқи суханони манбаъ, аз ин пеш бо намояндагони минтақавии ширкати «Microminet» — и Австрия қарордод дар бораи ба таври бебозгашт супурдани барномаи литсензиядори комютерии «Microminet» ба Сарраёсати геология ба маблағи 416 ҳазор доллари ИМА имзо шуда буд. Барномаи мазкур дар Маркази маълумотҳои илм дар бораи замин мавриди истифода қарор мегирад. «Тарбияи мутахассисони ҷавони кишвар дар заминаи ин ду барномаи компютерӣ ба Ҳукумати ҶТ имкон медиҳад, ки дар бораи истифодаи оқилонаю самарабахши қаъри замин, кори судманди корхонаи истихроҷи маъдан бо назардошти вазъи бозори ашёи хоми минералӣ маълумоти дақиқ дошта бошад», — зикр намуд манбаъ.