Манфиати бештар аз узвият ба СҶТ

Душанбе, 23 май.(АМИТ “Ховар”, Марзия Саидова).- Манфиатҳо ва чолишҳо аз узвият дар Созмони ҷаҳонии тиҷорат /СҶТ/ ва таҷрибаи кишварҳои дигар аз раванди гуфтушунидҳо ва узвият дар СҶТ дар маркази таваҷҷўҳи давраи омўзишӣ, ки таҳти унвони “ Дарёфти манфиати бештар аз узвият дар СҶТ –таҷрибаи кишварҳои дигар” муддтаи ду рўз дар Душанбе идома дошт, анҷом ёфт. Давраи омӯзишӣ дар доираи лоиҳаи тозатасдиқи «Иҷрои талаботи СҶТ ва огоҳии доираҳои тиҷоратӣ аз шароити узвият ба он» созмон дода шуд. Мавриди зикр аст, ки ин лоиҳа аз ҷониби Идораи давлатии Швейтсария дар умури иқтисод (СЕКО) маблағгузорӣ мешавад ва онро Маркази байналмилалии тиҷорат /МБТ/ дар ҳамкорӣ бо Вазорати рушди иқтисод ва савдои ҷумҳурӣ, Палатаи савдо ва саноати кишвар, иттиҳодияҳои тиҷоратӣ ва ширкатҳои ироагари хадамот амалӣ менамояд. Лоиҳаи мазкур бахше аз Барномаи СЕКО доир ба ҳамкории тиҷоратӣ дар Тоҷикистон буда, мусоидат ба иҷрои ислоҳоти маҷмӯъӣ дар ин кишвар ҷиҳати узвият дар СҶТ-ро ҳадаф қарор додааст. Лоиҳа аз ислоҳот дар соҳаҳои саноати кишоварзӣ, нассоҷӣ, ироаи хадамоти моливу алоқа ва нақлиёту энергетика пуштибонӣ мекунад.Намояндагони ниҳодҳои марбутаи давлатӣ, СЕКО, СҶТ, МБТ, созмонҳои дигари байналмилалӣ ва соҳибкорони тоҷик зимни ин нишаст низоми тиҷорати хидматрасониҳо дар доираи СҶТ ва нақши хидматрасониҳо дар раванди узвият ба ин созмон, ҳамчунин таҷрибаи кишварҳое, ки ба тозагӣ узви ин созмон гардидаанд, дар иртибот ба хидматрасониҳои фавқуззикрро баррасӣ намуданд. Ориф Ҳусайн, мушовири аршади МБТ дидра узвият дар СҶТ ва собиқ мудири шӯъбаи узвият дар СҶТ, иштирокдорони давраи омӯзиширо бо мӯҳтавои муколамаи давлат ва ҷомеа, тарғиби тиҷорат, таҷрибаи кишварҳои дигар дар ин росто ва гуфтушунидҳои марбут ба сиёсати тиҷорӣ шинос намуд. Мавсуф мегўяд, ки «тавоноии бахши хусусӣ барои истифода аз имконоте, ки чунин низом медиҳад, дар бисёр мавридҳо аз иҷрои ислоҳоти дохилӣ аз ҷониби ҳукумат бо ризоияти якдилонаи ҳамаи ҷонибҳои манфиатдор вобаста аст. Ҳукумат бояд шароитеро барои соҳибкорӣ фароҳам биоварад, ки сармояи хусусӣ ба иқтисоди дохилӣ ҷалб гардад».Ҳамзамон Жан-Себастян Рур, мутахассиси аршади шӯъбаи сиёсати тиҷоратӣ дар МБТ гуфт, ки “бидуни шубҳа, узвият дар СҶТ ҳукуматро муваззаф мегардонад, то ислоҳоти дохилиро ба анҷом бирасонад” Дар нишаст масоили дастрасӣ ба хидматрасониҳои зерсохтории рақобатпазир, ба мисли алоқа, энергетика, нақлиёт, машваратҳои давлат ва ҷомеа дар самти узвият дар СҶТ, вазифаҳои хизматгузорӣ низ матраҳ гаштанд. СҶТ ниҳоди байналмилалӣ буда, қоидаҳои тиҷорат миёни кишварҳоро танзим менамояд, то ба ин васила ба истеҳсолкунандагон, пешниҳодкунандагони хизматрасониҳо, содиркунандаҳо ва воридкунандаҳо дар тиҷораташон мусоидат намояд. Алҳол 155 кишвар узви СҶТ буда, гуфтушунидҳои ду давлати дигар бо муваффақият анҷом пазируфтаву онҳо мунтазири тасдиқи узвияти худанд. 22 давлати дигар аз ҷумла, Тоҷикистон дархости узвият ба СҶТ намудаанд ва дархости онҳо дар марҳилаҳои мухталифи баррасӣ қарор дорад.12.06.