Мавсими Ҳаҷ- 2012 оғоз шуд

Душанбе, 10 май. (АМИТ «Ховар», Дилшодаи Хайруллоҳ).-Имрӯз дар Кумитаи дини назди Ҳукумати Ҷумҳурии Тоҷикистон ҷаласаи баррасии мактуби Прокуратураи Генералии Ҷумҳурии Тоҷикистон доир ба шаффоф гузаронидани мавсими Ҳаҷ- 2012 баргузор гардид. Дар ҷаласа раиси Кумитаи корҳои дини назди Ҳукумати Ҷумҳурии Тоҷикистон Абдураҳим Холиқов, намояндаи Прокуратураи Генералии Ҷумҳурии Тоҷикистон, мудири ташкили ҳаҷ ва равобити байналмилалии Кумитаи корҳои дин Абдуғаффор Юсупов ва мудирони бахшҳои динии шаҳру ноҳияҳои ҷумҳурӣ ҳузур доштанд. Дар ҷаласа масъалаҳои тарзи дуруст ба роҳ мондани ҳуҷҷатҳои зоирин, пешгирии ҳолатҳои қонунвайронкунӣ, роҳ надодан ба амалҳои коррупсионӣ дар мавсими Ҳаҷ- 2012 ва дигар масъалаҳои марбут ба ташкили ҳаҷ мавриди муҳокима қарор гирифтанд. Ҳамчунин доир ба дигар масъалаҳои вобаста ба ин маросими муҳими динӣ ҳозирин андешаҳои худро баён доштанд. Зикр шуд, ки қабули аснод барои ҳаҷ аз якуми майи соли ҷорӣ оғоз шуда, то охири ҳамин моҳ ба поён мерасад. Барои довталабони Хонаи Худо ҳуҷҷатҳои зерин лозиманд: ариза, шиносномаи хориҷӣ (набояд мӯҳлати истифодааш аз 8 моҳ кам бошад), нусхаи шиносномаи дохилӣ, шаҳодатномаи тиббӣ, 4 дона сурати 3 бар 4, пардохти маблағ то 10 рӯз баъд аз супоридани ҳуҷҷатҳо ва нусхаи расиди он, то панҷ соли охир нарафтани зоир ба Хонаи Худо, ҳуҷҷат доир ба маълумоти пурраи зоир (суроға, макони зист, маълумот, рақами телефон ва ғ.), ҳадди ақал 8 моҳ дар қайди макони истиқоматиаш будани зоир, зоир (мард)аз 80 боло ва аз 18 поён набошад ва зани аз 50 сола поён бояд маҳрам дошта бошад (ҳуҷҷатҳои тасдиқкунандаи маҳрам ҳатмист), андозаи либос, пойафзол, шим ва ғайра.Ҳуҷҷатҳо то охири моҳи ҷорӣ бояд супорида шаванд.