Мавзуна Чориева соҳиби ВАЗ 21-07 гардид
Душанбе, 22 май. ( АМИТ «Ховар», Афшини Муқим).- Дирӯз дар Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо иштироки раиси Кумита Маликшо Неъматов, варзишгарон, устодони варзиш, алоқамандони варзиш ва инчунин доираи васеи рӯзноманигорон ҷамъомади тантанавӣ баргузор гардид. Дар ҷамъомад аз ҷониби раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшоҳ Неъматов ба якчанд варзишгар, ки борҳо мавқеи Тоҷикистонро дар сатҳи ҷаҳонӣ муаррифӣ намудаанд, унвонҳои гуногуни варзишӣ дода шуд. Ҳамчунин дар ҷамъомад ба Мавзуна Чориева — барандаи роҳхати олимпии Лондон- 2012 аз номи Президенти Кумитаи миллии олимпии Ҷумҳурии Тоҷикистон Эмомалӣ Раҳмон автомобили тамғаи ВАЗ 21-07 ҳадя карда шуд. Ба Анвар Юнусов ва Парвиз Собиров, ки ҳар яке соҳиби роҳхати бозиҳои олимпии Лондон — 2012 буда, инчунин дар ин ҷамъомад иштирок доштанд, аз ҷониби Кумитаи миллии олимпии кишвар тӯҳфаи молӣ ба маблағи 5 ҳазор сомонӣ супорида шуд. Маврид ба ёдоварист, ки аз ҷониби дигар ширкату сохторҳо низ ин варзишгарон бо мукофотҳои пулӣ қадрдонӣ гардиданд. Хотиррасон мекунем, ки то имрӯз варзишгарони тоҷик соҳиби 13 роҳхати олимпии бозиҳои тобистонаи Лондон — 2012 гардидаанд.