Муҳокимаи масъалаҳои молиявӣ

Душанбе, 24 май. (АМИТ «Ховар», Покиза Маҳмадбекова). – 23 май дар шаҳри Душанбе мулоқоти муовини аввали вазири молияи Тоҷикистон Ҷамолиддин Нуралиев бо ҳайати Бонки умумиҷаҳонӣ бо сарварии директори бахши идораи иқтисодии гурӯҳи Бонки умумиҷаҳонӣ Ивон Тсикат баргузор гардид. Тавре аз маркази матбуоти Вазорати молияи кишвар ба АМИТ «Ховар» хабар доданд, ҷонибҳо дар ҷараёни мулоқот натиҷаи сафари ҳайати намояндагони як қатор сохторҳои давлатии Ҷумҳурии Тоҷикистон ба Гурҷистонро мавриди муҳокима қарор доданд.Ҷамолиддин Нуралиев ҷиҳатҳои мусбати низоми идораи давлатии Гурҷистонро зикр намуда, пешниҳод кард, ки таҷрибаи кори низоми андоз дар ҷараёни роҳандозии ислоҳот дар Тоҷикистон, аз ҷумла баъди анҷом ёфтани тарҳрезии варианти ниҳоии лоиҳаи таҳрири нави Кодекси андози Ҷумҳурии Тоҷикистон мавриди истифода қарор дода шавад.Ҷ. Нуралиев ҳамчунин ба роҳбари ҳайат Ивон Тсиката барои сӯҳбати пурмазмуну муфид изҳори миннатдорӣ намуда, зикр кард, ки ҳамкорӣ бо Бонки умумиҷаҳонӣ минбаъд ҳам густариш хоҳад ёфт.