Муаррифии чеҳраи бонувони тоҷик дар Кохи Ҷомӣ

Душанбе, 16 май. (АМИТ «Ховар»).-24-уми майи соли равон дар Кохи Ҷомӣ ҷамъбасти озмуни «Чеҳракушоӣ» доир мегардад, ки дар он муайян кардани муаллифони ғолиб ва чеҳраҳои беҳтарин дар назар аст. Озмуни «Чеҳракушоӣ», ки ба шарофати 20-солагии Истиқлолияти давлатии ҶТ аз тарафи маҷаллаи «Бонувони Тоҷикистон» бо дастгирии дастгоҳи иҷроияи Президент ва ҳукумати кишвар баргузор гардид, қадами муҳимест дар роҳи татбиқи сиёсати гендерии Президент ва Ҳукумати ҶТ. Дар ин озмун беҳтарин рӯзноманигорони тоҷик ширкат варзида, бо очеркҳои ҷолиб истеъдоди сарварии 24 бонуи фаъоли кишварро рӯнамоӣ намудаанд. Шарти озмун аз ҷониби мардони журналист муайян кардани арзиш, истеъдод ва тавоноии ҳанӯз шинохтанашудаи бонувони сазовори мақому вазифаҳои роҳбарӣ ва барои ҳукумату ҷомеа муаррифӣ кардани онҳо буд. Нахустин бор дар Тоҷикистон озмуни донишу заковат, истеъдоду зарфиятҳои бонувон барои ишғоли мақоми сарварӣ дар чунин сатҳи баланд доир мегардад. Ёдовар бояд шуд, ки дар озмун ҳузури шахсиятҳои шинохтаи давлатию ҷамъиятӣ ва адибону рӯзноманигорони маъруфи кишвар, ҳамчунин ҳунарнамоии беҳтарин сарояндагону раққосони дастаҳои ҳунарии мамлакат дар назар аст.