Нобурда ранҷ ганҷ муяссар намешавад

Хоруғ, 14 май. (АМИТ «Ховар», Л.Додо ). – Сокини қарияи Дерзуди ноҳияи Рӯшон Ҷамшед Мавлододов 11 гектар замини сангистону регзорро бо заҳмати хеш обод намуда, дар он асосан ба сабзавоткорӣ машғул аст ва ҳар сол аз ин замин ҳосили баланди картошка, пиёз, қаламфур, помидору бодиринг мерӯёнад. Имрӯзҳо кишти тирамоҳии қаламфур ва пиёз дар нашъунамо буда, он рӯзҳои наздик ба фурӯш бароварда мешавад. Деҳқони асил дар паҳлӯи заминаш ҳавзи моҳипарварӣ низ бунёд карда, аз вилояти Хатлон 9 ҳазор сар моҳича овард. Инак ӯ ҳам аз замин рӯзиашро пайдо мекунаду ҳам аз ҳавзи моҳипарварӣ. Ин марди меҳнатӣ ба хотири беҳбудии рӯзгораш чун дигарон роҳи Русияро пеш нагирифт, балки дар деҳаи сангистонаш ҳам барои худаш ҷои кор ёфту ҳам барои аҳли оилааш. Ва на танҳо ҷои кор пайдо намуд, балки рӯзгорашро низ обод гардонид.