Оқил Оқилов озими пойтахти Туркманистон мешавад

Душанбе, 29 май. (АМИТ «Ховар», Покиза Маҳмадбекова). — Имрӯз Сарвазири Ҷумҳурии Тоҷикистон Оқил Оқилов ҷиҳати иштирок дар ҷаласаи Шӯрои нахуствазирони кишварҳои узви Иттиҳоди Давлатҳои Мустақил озими пойтахти Туркманистон шаҳри Ашқобод мешавад. Тавре ки аз котиботи Сарвазири ҷумҳурӣ ба мухбири АМИТ «Ховар» иттилоъ доданд, дар ҷаласаи Шӯрои нахуствазирони кишварҳои узви ИДМ, ки 30 –юми майи соли равон баргузор мегардад, баррасии якчанд лоиҳаву ҳуҷҷатҳо дар самтҳои гуногуни ҳамкориву ҳамгиройии кишварҳои узви иттиҳод дар назар аст. Аз рӯи иттилоъи манбаъ баррасиву таҳлили лоиҳаҳои қарор «Дар бораи Консепсияи озодкунии бозорҳои хизматгузории молиявии кишварҳои узви ИДМ» аз масоили муҳими ҷаласа маҳсуб меёбад. Бояд гуфт, ки дар ин сафар Сарвазири ҷумҳуриро намояндагони вазорату идораҳои дахлдори кишвар ҳамроҳӣ мекунанд.