Офарин, Мавзуна !

Душанбе, 16 май. ( АМИТ «Ховар», Аловиддин Бӯриев).- Мавзуна Чориева дар қатори беҳтарин варзишгарони кишвар тавонист роҳхати олимпии навбатиро барои Тоҷикистон дар риштаи бокс ба даст оварад. Ӯ аввалин бонуест аз Тоҷикистон, ки ба ин комёбӣ ноил гардидааст. Ин духтари нозукандоми қавиирода бо зарбаҳои сангини худ дар ринги Чин дар рақобатҳои якҳаштниҳоии чемпионати ҷаҳон муштзани Қирғизистон Антонина Шевченкоро бо натиҷаи 10 бар 2 шикаст дода, ба мақсади худ расид ва ҳамакнун метавонад ба гирифтани яке аз медалҳои чемпионати ҷаҳон талош варзад. Мавзуна дар зӯрозмоии навбатӣ бо Эстели Моссели аз кишвари Фаронса қувва меозмояд. Ба ин тартиб шумораи дорандагони роҳхати олимпӣ дар байни варзишгарони Тоҷикистон ба 13 нафар расид.