Озмун барои таҳсил дар шаҳри Маскав

Душанбе, 7 май. (АМИТ «Ховар», Покиза Маҳмадбекова). — Бонки миллии Тоҷикистон барои хатмкардагон ва хонандагони синфи 11-и мактабҳои миёнаи таҳсилоти умумии ҷумҳурӣ, ки бо баҳои хубу аъло таҳсилро анҷом додаанд, озмун эълон менамояд. Тавре, ки дар сӯҳбат ба мухбири АМИТ «Ховар» роҳбари хадамоти матбуоти Дастгоҳи роҳбарияти Бонки миллии Тоҷикистон Абдуғафор Қурбонов иттилоъ дод, мақсади баргузории озмун аз интихоби номзади лаёқатманд (як нафар) барои давом додани таҳсил дар Донишгоҳи миллии тадқиқотии ядройи ш. Маскави Федератсияи Россия мебошад. «Номзадҳое пешниҳод мешаванд, ки дорои дониши хубу аъло аз фанҳои забони русӣ, математика ва физика бошанд», — афзуд А. Қурбонов. — Бояд гуфт, ки номзадҳое, ки талаботи озмунро иҷро менамоянд, тибқи тартиби муайяншуда ба курси якуми донишгоҳи номбаршуда аз рӯи ихтисоси “Амнияти иттилоотии сохторҳои молиявӣ ва иқтисодӣ” гузаронида шуда, (баъд аз суҳбат дар ш. Маскав), бо хобгоҳ ва идрорпули (стипендия)-и муносиб таъмин мегарданд ва баъд аз хатми таҳсил ба Бонки миллии Тоҷикистон ба кор қабул карда мешаванд. Хоҳишмандоне, ки мехоҳанд дар озмун иштирок кунанд, бояд пурсишнома (анкета)-ро пур намоянд. Комиссияи Бонки миллии Тоҷикистон баъди омӯзиши амиқи пурсишномаҳои довталабон 10 нафар номзадро барои гузаронидани сӯҳбат ба бонк даъват менамояд. Бояд гуфт, ки мӯҳлати қабули пурсишномаҳо — то 11 майи соли равон то соати 17-00 давом хоҳад кард. Рӯзи гузаронидани озмун 14 майи соли 2012, соати 17-30 Пурсишномаҳо бояд ба почтаи электронии OZMUN@NBT.TJ равон карда шаванд. Телефон барои маълумот: 600-32-13, 600-32-31, 600-32-32