Пешниҳоди Тоҷикистон ба Бонки Ҷаҳонӣ
Душанбе, 18 май.(АМИТ «Ховар», Марзия Саидова).-Масоили густариши ҳамкориҳои байни палатаи поёнии парлумони Тоҷикистон бо Бонки Ҷаҳонӣ дар меҳвари мулоқоти Сафаралӣ Раҷабов, раиси Кумитаи Маҷлиси намояндагон доир ба иқтисод ва молия ва намояндаи Бонки Ҷаҳонӣ – сардори департаменти ислоҳоти сохтори давлатии Бонки Ҷаҳонӣ доир ба Аврупо ва кишварҳои Осиёи Марказӣ Билл Доротинск қарор дошт.Раиси Кумитаи палатаи поёнии парлумони Тоҷикистон гуфт: тибқи санади ҳамкорӣ, ки байни Маҷлиси намояндагон ва Бонки Ҷаҳонӣ дар соли 2010 ба имзо расидааст, дар палатаи поёнии парлумони Тоҷикистон котибот таъсис дода шуд, ки он фаъолияти худро аз соли 2011 ба роҳ мондааст. Нақши котибот дар мавриди таҳияи лоиҳаи қонунҳои вобаста ба молия ва буҷа калон мебошад, афзуд С. Раҷабов. Мавсуф пешниҳод намуд, ки Бонки Ҷаҳонӣ ҷиҳати анҷом додани корҳои таҳқиқотӣ ва таҳлилӣ дар соҳаҳои гуногуни иқтисодиёти Тоҷикистон мутахассони беҳтаринро ҷалб намуда, нусхаи хулосаҳои ин таҳлилу таҳқиқот ба Кумитаи иқтисод ва молияи Маҷлиси намояндагон ироа гардад.Намояндаи Бонки Ҷаҳонӣ Билл Доротинск сатҳи ҳамкориҳои Тоҷикистон бо Бонки Ҷаҳониро мувофиқи манофеи ҳарду ҷониб арзёбӣ намуда, хостори тавсеаи муносибот бо Тоҷикистон шуд. Билл Доротинск таъсиси котиботи назди Кумитаи иқтисод ва молияи Маҷлиси намояндагонро омили асосӣ ва таҳкимбахши муносиботи Маҷлиси намояндагон ва Бонки Ҷаҳонӣ арзёбӣ намуд.