«Рӯзи шеъри Махдумқулӣ» дар Тоҷикистон

Май 18, 2012 13:27

Душанбе, 18 май. (АМИТ «Ховар», Мавҷуда Анварӣ).- Имрӯз дар толори Пажӯҳишгоҳи забон, адабиёт, шарқшиносӣ ва мероси хаттии ба номи Рӯдакӣ бахшида ба 279-солагии сардафтари адабиёти классикии Туркманистон, мутафаккир Махдумқулӣ дар мавзӯи «Рӯзи шеъри Махдумқулӣ» конфронси илмӣ доир гардид. Конфронсро бо сухани ифтитоҳӣ ноиби президенти Академияи илмҳои ҶТ, раиси Ҷамъияти дӯстии «Тоҷикистону Туркманистон» С. Одинаев оғоз бахшид. Сипас иҷрокунандаи вазифаи сафири Туркманистон дар Тоҷикистон Б. Г. Ниёзалиев аҳли нишастро бо ин рӯзи фархунда табрик намуд. Ҳамчунин Раиси Иттифоқи нависандагони Тоҷикистон Меҳмон Бахтӣ, олимон М. Музаффарӣ, А. Хоҷаев, С. Муллоҷонов ва дигарон дар мавзӯъҳои «Махдумқулӣ ва адабиёти форсу тоҷик», «Масоили фалсафӣ дар эҷодиёти Махдумқулӣ ва вазъи сиёсию иҷтимоии асри Махдумқулӣ» маърӯзаҳо намуданд. Қайд гардид, ки саҳми Махдумқулӣ дар адабиёти мардуми Шарқ хеле калон аст. Поягузори адабиёти туркман аз намояндагони маъруфи давр ба шумор рафта, бо ду забон- модарӣ ва форсӣ дар васфи ватандӯстӣ ва муҳаббат ба халқи худ шеърҳо эҷод намудааст. Махдумқулӣ дар ашъораш баёнгари умед ва орзуҳои мардум буда, ба таззодҳои иҷтимоӣ бо андешаҳои худ посух гуфтааст. Дар конфронс олимон, донишмандони маъруфи ҳар ду кишвар, намояндагони сафоратҳо ва туркманҳои муқими Тоҷикистон ширкат намуданд. Ёдовар мешавем, ки дар Туркманистон ҳар сол 18 май ҳамчун рӯзи эҳё, ягонагӣ ва назм таҷлил гардида, онро мардуми ин сарзамин ҳамчун рӯзи иди давлатӣ ҷашн мегиранд.Тибқи суханони ташкилкунандагон, «Рӯзи шеъри Махдумқулӣ» дар Тоҷикистон аз дӯстии қавии ду кишвари бародар — Туркманистон ва Тоҷикистон шаҳодат медиҳад.

Май 18, 2012 13:27

Хабарҳои дигари ин бахш

Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд