Радиои «Ховар» – «Падидаи сол»

Душанбе, 3 май. (АМИТ «Ховар», Афшини Муқим). -Имрӯз дар шаҳри Душанбе ба ифтихори рӯзи умумиҷаҳонии озодии баён конфронси кишварӣ таҳти унвони «Озодии баён: воқеият ва сарнавишти ВАО-и мустақил дар Тоҷикистон» баргузор гашт.   Дар конфронс аз ҷониби дабири кулли Ассотсиатсияи Медиа- алянси Тоҷикистон Хуршеди Атовулло ҷоизаи «Падидаи сол» дар бахши радио ба радиои «Ховар» супорида шуд. Хотиррасон мекунем, ки радиои «Ховар» навтаъсис буда, 2 июни соли 2011 аввалин маротиба рӯи мавҷи 101,5 FM садо додааст. Тӯли ин муддати начандон зиёд ин радио тавонист, ки бо мӯъҷазбаёнӣ ва суруду таронаҳои дилошӯб дар байни шунавандагон маҳбубияти хосса пайдо кунад. Мавриди зикр аст, ки шунавандагон метавонанд дар тамоми рӯи олам радиои «Ховар»-ро аз тариқи сомонаи www.khovar.tj низ бишнаванд. Имрӯзҳо шиори радиои «Ховар» вирди забони ҳамагон аст: «Садое, ки бояд шунид!!!»