Раиси Маҷлиси миллӣ ба парламентарҳои аврупоӣ чӣ гуфт?

Душанбе, 7 май.(АМИТ «Ховар», Марзия Саидова).- Раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев зимни мулоқоташ бо роҳбари ҳайати гурӯҳи Парлумони Аврупо Паоло Бартолотси аз парламентарҳои аврупоӣ хоҳиш кард, ки зимни сафари худ ба Тоҷикистон доир ба вазъи феълӣ, пешрафти ҳаёти мамлакат дар асоси плюрализми сиёсӣ, эҳтиромгузорӣ ба арзишҳои демократӣ ва татбиқи барномаҳои созандаи кишвар ҷиҳати бунёди ҷомеаи ҳуқуқбунёду дунявӣ воқеияти ҳақиқиро таблиғ намоянд. Дар мулоқот ҳамзамон самтҳои афзалиятноки ҳамкориҳои байнипарлумонии Тоҷикистон бо Иттиҳоди Аврупо матраҳ гардида, зикр шуд, ки палатаи болоии парлумони Тоҷикистон бо як қатор парлумонҳои кишварҳои Иттиҳоди Аврупо ҳамкории самарабахш дошта, дар ин самт гурўҳҳои дўстии байнипарлумонӣ таъсис дода шудааст. Раиси палатаи болоии парлумони Тоҷикистон таваҷҷўҳи ҳайати парлумони Аврупоро ба густариши робитаҳои афзалиятнок нигаронид. Таъкид гардид, ки дар шароити феълӣ тавсеаи ҳамкориҳо дар бахши таҳкими муносибатҳои иқтисодию тиҷоратӣ ва ҷалби сармояи кишварҳои Иттиҳоди Аврупо ба иқтисодиёти Тоҷикистон, бахусус ҷиҳати татбиқи лоиҳаҳои гидроэнергетикӣ ба мақсад мувофиқ аст. Зикр шуд, ки вазъи ҳамкориҳои иқтисодию тиҷоратии мавҷуда, ки сармояи бевоситаи Иттиҳоди Аврупо дар Тоҷикистон ҳамагӣ 30%-ро ташкил медиҳад, ҷавобгўи потенсиали ҷонибҳо набуда, боиси бознигарист, зеро заминаҳои ҳуқуқӣ ва иродаи мавҷудаи сиёсӣ аз ҷониби тарафҳо тақозо менамояд, ки сатҳи ҳамкориҳо баланд бардошта шаванд.Ҳамзамон Маҳмадсаид Убайдуллоев масъалагузорӣ намуд, ки барои рушди муносибатҳои ҳасанаи байнипарлумонӣ зарурати ташкили институти нави дорои нерўи густариши ҳамкориҳои Маҷлиси миллии Маҷлиси Олии Ҷумҳурии Тоҷикистон ва Парлумони Аврупо мувофиқи мақсад аст.Паоло Бартолотси афзуд, ки пешниҳодҳои ироагардида дар сатҳи мақоми ваколатдори Парлумони Аврупо баррасӣ гашта, ҷиҳати расидан ба ҳадафҳои созанда тамоми тадбирҳо амалӣ мешаванд.