Раиси «Созандагони Ватан» бо сиёсатшиносони ҷавон вохӯрд

Душанбе, 25 май. (АМИТ «Ховар», Дилшодаи Хайруллоҳ).- 24 майи соли равон дар Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд мулоқоти раиси Ташкилоти ҷамъиятии ҷавонон «Созандагони Ватан» Адҳам Мирсаидов бо донишҷӯёни факултаи «Сиёсатшиносӣ ва муносибатҳои байналмилалӣ (дипломатия)»-и донишгоҳи мазкур баргузор гардид. Дар чорабинӣ зиёда аз сесад нафар донишҷӯи ихтисоси сиёсатшиносӣ, минтақашиносӣ ва дипломатия ширкат варзиданд.  Раиси «Созандагони Ватан» Адҳам Мирсаидов аз ҳадафу мақсадҳои созмон сухан карда, вобаста ба падидаҳои сиёсиву иҷтимоии ҷаҳониву минтақа, шомилшавии ҷавонон ба ҷараёнҳои номатлуб, принсип ва хусусиятҳои давлати дунявӣ ибрози ақида намуд. Ҳамзамон дастоварду имкониятҳои мавҷудаи даврони истиқлолиятро барои иштирокдорон бори дигар хотиррасон намуда, ҳозиринро ба корҳои созандагиву бунёдкорӣ ва дар маъракаҳои сиёсӣ аз даст надодани зиракиву ҳушёрии сиёсӣ даъват намуд. Сипас байни меҳмонон ва донишҷӯён сӯҳбати ошкоро ба вуқӯъ пайваста, сиёсатшиносони ҷавон ҷиҳати пешравии ҳаёти ҷавонон таклифу пешниҳодҳои хешро манзур карданд. Бояд зикр намуд, ки Донишгоҳи давлатии ҳуқуқ, бизнес ва сиёсати Тоҷикистон дар вилояти Суғд ягона муассисаи олии таълимиест, ки мутахассисони сиёсатшинос, минтақашинос ва дипломатро тайёр менамояд.