Роҳхат ба бозиҳои олимпӣ зиёд шуд

Душанбе, 2 май. ( АМИТ «Ховар», Аловиддин Бӯриев).- Ду нафар паҳлавони тоҷик Расул Боқиев ва Муҳаммадмурод Абдураҳмонов соҳиби роҳхат ба Бозиҳои тобистонаи олимпӣ шуданд. Бино ба хабари Кумитаи олимпии мамлакат Расул Боқиев баъди дар шаҳри Тошканд дар вазни то 73 кг барандаи медали биринҷии чемпионати Осиё шудан дар рейтинги ҷаҳонӣ 5 зина боло баромада, дар зинаи 18-ум ҷой гирифт. Аз рӯи меъёрҳои олимпӣ дзюдочиёне, ки дар вазни худ дар рейтинги ҷаҳонӣ ҷойҳои аз 1-ум то 22-юмро ишғол менамоянд, соҳиби роҳхатҳои олимпӣ мешаванд. Расул дар ин ҷода ягона паҳлавони дзюдочӣ дар ҷумҳурӣ мебошад. Муҳаммадмурод Абдураҳмонов мувофиқи рӯйхате, ки Федератсияи дзюдои Осиё пешниҳод кардааст, дар Олимпиадаи Лондон иштирок хоҳад кард. Ба ин феҳрист 12 дзюдочии беҳтарини Осиё шомиланд. Расул маротибаи дуввум ва Муҳаммадмурод аввалин бор дар Бозиҳои тобистонаи олимпӣ ширкат меварзанд.