Сӯҳбати Ш.Саид бо намояндагони БАБТ
Душанбе, 31 май. (АМИТ «Ховар», Покиза Маҳмадбекова). – 30 май раиси Палатаи савдо ва саноати ҶТ Шариф Саид ва намояндагони Бонки аврупоии бозсозӣ ва тавсеъа (БАБТ), роҳбари барномаи минтақавии Осиёи Марказӣ Шоқтибек Имашов, ҳамчунин мутахассиси калони барномаи ВAS дар Тоҷикистон Ситора Бобоҷонова масъалаҳои ҳамкорӣ ҷиҳати дастгирии бахши инфиродиро мавриди муҳокима қарор доданд. Тавре аз маркази матбуоти ПСС ҷумҳурӣ ба АМИТ «Ховар» хабар доданд, зимни мулоқот Ш.Имашов аз фаъолияти БАБТ дар ҷумҳурӣ, роҳандозӣ шудани машварату тренингҳо ва муаррифии барномаи ВAS ҷиҳати бо истифода аз системаи КАЙЗЕН дар амал татбиқ намудани барномаи мазкур нақл кард. Шариф Саид дар навбати худ қайд намуд, ки дар байни аъзои ПСС ҶТ бисёр коршиносоне ҳастанд, ки дар амри дастрас шудани сертификатҳои амвол маслиҳатҳои муфид медиҳанд. Ҳамчунин зикр шуд, ки истеҳсолкунандагони маҳсулоти кишоварзӣ проблемаҳои зиёде доранд, ки онҳоро тавассути барномаи нав ҳал хоҳанд кард. Ин проблемаҳо иборат аз маблағгузорӣ ва дастгирии техникии ҳам содироти сабзавот ва меваи тару тоза ва ҳам коркарди онҳо мебошад. Ситора Бобоҷонова зикр намуд, ки дар охири моҳи июн менеҷери Бонки аврупоии бозсозӣ ва тавсеъа оид ба барномаи нав ба Тоҷикистон меояд. Ҷонибҳо аҳд карданд, ки дар шаҳри Душанбе ва минтақаҳои ҷумҳурӣ барои аъзои палата ҳамоишҳои махсус ташкил намоянд.