Шаҳрдор ба ҷавонон чӣ гуфт?

Душанбе, 23 май.(АМИТ «Ховар», Марзия Саидова).- Ҷавонони пойтахтро раиси шаҳри Душанбе Маҳмадсаид Убайдуллоев бо Рўзи ҷавонон 23- май зимни мулоқоташ самимона шодбош гуфта, ба онҳо барои нақши муассир гузоштан дар пешрафту ободонии пойтахт ва кашфи асрори илму дониш даъват ба миён оварда, дар кору рўзгорашон комёбиҳо таманно намуд. Мулоқоти шаҳрдори Душанбе бо ҷавонони пойтахт дар доираи «Даҳ Рўзи ҷавонони шаҳри Душанбе» дар толори КВД «Маркази равобити пойтахт» баргузор гардид ва дар он фаъолҷавонони касбу кори гуногуни шаҳри Душанбе ширкат доштанд. Назар ба иттилои Шавкат Саидов, котиби матбуоти раиси шаҳри Душанбе, мулоқоти раиси шаҳр бо ҷавонон дар фазои ошкоро ва озодбаёнӣ барпо шуд. Раиси шаҳр аз дархосту ниёзҳои ҷавонон огоҳ гардида, дар ҳалли онҳо бо инобати ҷалби нерўи ҷавонони ташаббускор ба масъулини шаҳрдорӣ дастуру супоришҳои мушаххас дод.Маҳмадсаид Убайдуллоев бо хулоса аз мавқеъгириҳои нокифояи ҷавонон ва иттилои кофӣ надоштани онҳо аз ҳаёти шаҳр, ки мебоист доир ба пешрафту ҳалли норасоиҳои ҷойдошта бештар саволу пешниҳод ва масъалагузорӣ мекарданд, изҳори нигаронӣ намуд. Ҷиҳати идомаи сўҳбат ва мукотибаҳои мақсаднок раиси шаҳр таъкид намуд, ки ҷавонон имкон доранд дар зарфи як моҳ дархосту пешниҳодҳои худро тавассути почтаи электронии раиси шаҳр dushanbe80@yahoo.com, саҳифаи раиси шаҳр дар сомонаи иҷтимоии Фейсбук ё худ тавассути Раёсати ҷавонон, варзиш ва сайёҳии шаҳри Душанбе ирсол созанд.