Шаҳрдор хотираи ҳунарпеша ва шоиронро абадӣ мегардонад

Душанбе, 25 май.(АМИТ «Ховар», Марзия Саидова).-Бо мақсади абадӣ гардонидани хотираи Ҳанифа Мавлонова, Ҳунарпешаи халқии Иттиҳоди Ҷумҳуриҳои Шўравии Сотсиалистӣ /ИҶШС/, вакили мардумии ИҶШС, профессор, кўчаи Пионерскаяи ноҳияи Исмоили Сомонии Душанбе ба номи Ҳанифа Мавлонова гузошта мешавад. Дар ин хусус қарори марбутаи раиси шаҳри Душанбе Маҳмадсаид Убайдуллоев ба тасвиб расид. Ҳамзамон бо қарорҳои дигари шаҳрдорӣ кўчаи Привокзалнаяи ноҳияи Шоҳмансур ба номи Қутбӣ Киром, Шоири халқии Тоҷикистон, дорандаи Ҷоизаи давлатии ба номи Рўдакӣ гузошта шуда, кўчаи 9 январи ноҳияи Сино ба исми Шоири халқии Тоҷикистон, дорандаи Ҷоизаи давлатии ба номи Рўдакӣ Сафармуҳаммад Аюбӣ номгузорӣ мегардад. Ин иқдом бо мақсади абадӣ гардонидани хотираи шахсиятҳои барҷастаи миллат, ки дар рушду такомули санъати мусиқии касбӣ ва опера, тарбияи кадрҳои соҳаи санъат, баланд бардоштани пояи назми тоҷик, рушди адабиёт ва фарҳанги миллӣ саҳми беназир гузоштаанд, қабул гардидааст.