Табдили партовгаҳ ба боғистон

Суғд, 11 май. (АМИТ «Ховар», Мирзалӣ Амонов).-Як мавзеи беобу санглохи бекорхобида, ки ҳатто ба партовгоҳ табдил ёфта буд, бо заҳмату ғайрати аҳли оила, пайвандон ва пайравони соҳибкорзан- сокини шаҳри Чкалов Ганҷина Раҳмонова ба макони сабзу хуррам табдил ёфт.Ба кори ободонию хуррамнамоии ин мавзеъ чанд тан аз деҳқонони соҳибтаҷриба ҷалб гардида, дар масоҳати 0,7 гектар бо истифодаи конструксияи оҳану бетонӣ, хишт ва ҷорӣ намудани усули қатравии обёрӣ дар шаҳри Чкалов ягона гармхонаи истеҳсоли сабзавоту зироати барвақтӣ ташкил шуд, ки ҳосили аввалини бодиринги гармхонаро ба тарбиятгирандагони мактаб — интернати шаҳр ҳамчун кӯмаки хайрия тақдим намуданд.Ҳамчунин дар ин мавзеъ майдони васеи сафедор, боғи зардолую олу, гелосу олуча, бодому чормағз бунёд гардид. Парвариши чанд навъи ангур, ки аз ниҳолхонаи ангурпарварони шаҳри Турсунзода оварда шудааст, василаи паҳн намудани таҷрибаи неки ангурпарварии ватанист.