Тайёрӣ ба иштирок дар Рӯзи миллии Тоҷикистон

Душанбе, 25 май. (АМИТ «Ховар», Покиза Маҳмадбекова). – 24 май дар шаҳри Душанбе мулоқоти раиси Палатаи савдо ва саноати Тоҷикистон Шариф Саид бо вакили муваққатии корҳои сафорати Ҷумҳурии Куриё дар Ҷумҳурии Тоҷикистон Ёнг Ҷон Гу баргузор гардид. Тавре аз ПСС ҷумҳурӣ ба АМИТ «Ховар» хабар доданд, ҷонибҳо иштироки Тоҷикистон дар Намоишгоҳи умумиҷаҳонии ЭКСПО – 2012 дар шаҳри Ёсуи Ҷумҳурии Куриёро мавриди муҳокима қарор доданд. Шариф Саид аз мазмуни нигораҳои Тоҷикистон, ки доираи васеи самтҳои рушди мамлакатро фаро мегиранд, муфассал нақл кард. Ёнг Ҷон Гу кореро, ки ПСС Тоҷикистон дар ҷараёни омода сохтани нигораҳои намоишгоҳ дар муддати кӯтоҳтарин анҷом ёфтааст, ба дараҷаи баланд арзёбӣ намуд.Шариф Саид хоҳиш кард, ки дар ҷараёни тайёрӣ барои иштирок дар Рӯзи миллии Тоҷикистон дар ЭКСПО – 2012 ба ҳайати расмии ҶТ кӯмак расонида шавад. Ёнг Ҷон Гу ин хоҳишро пазируфта ва изҳор дошт, ки ҳамкорӣ аз рӯи ҳамаи масъалаҳои марбут ба иштироки Тоҷикистон дар намоишгоҳи мазкур ривоҷ дода мешавад.