Тарғиби тарзи ҳаёти солим

Душанбе, 2 май. (АМИТ «Ховар», Лутфия Эшонқулова). – Чанде пеш кормандони Агентии назорати маводи нашъаовари назди Президенти ҶТ дар мактаби махсуси бачагону наврасони захираи олимпии рақами 1 – и шаҳри Душанбе таҳти шиори «Мо зидди маводи нашъаоварем» аз рӯи гимнастикаи бадеӣ мусобиқа ташкил намуданд.Тавре аз маркази матбуоти Агентии назорати маводи нашъаовар ба АМИТ «Ховар» хабар доданд, дар мусобиқа 57 нафар кӯдакони синнашон аз 4 то 15 иштирок намуда, маҳорати худро ба тамошобинони сершумор намоиш доданд.Ин тадбир ба манзури тарғиби тарзи солими зиндагӣ байни кӯдакону наврасон роҳандозӣ шуд.Ба гуфтаи манбаъ, чунин чорабиниҳои варзишӣ имкон медиҳанд, ки кӯдакон аз овони хурдсолӣ ба тарбияи ҷисмонӣ ва варзиш ҷалб карда шаванд.