Таъсиси гурўҳ Тоҷикистонро бо Латвия наздик месозад

Душанбе, 24 май.(АМИТ «Ховар», Марзия Саидова).-Дар парлумони Латвия (Сейм) гурўҳи дўстӣ ва ҳамкорӣ бо Маҷлиси миллии Маҷлиси Олии Ҷумҳурии Тоҷикистон созмон дода шуд, ки ҳадафаш таҳкими равобити байнипарлумонист. Гурўҳи мазкур дар худ 6 нафар намояндаи парлумони Латвияро муттаҳид намуда, онро Александр Саковски сарварӣ менамояд. Дар робита ба ин Салвита Аболтиня, раиси Сейми Латвия ба унвонии Маҳмадсаид Убайдуллоев, раиси Маҷлиси миллии Маҷлиси Олии Ҷумҳурии Тоҷикистон нома ирсол намуд. Дар нома гуфта мешавад, ки таъсиси гурўҳи дўстӣ миёни парлумонҳои Тоҷикистону Латвия дар таҳкими ҳамкориҳои байнипарлумонӣ ва тавсеаи робитаҳои судманди ҳар ду кишвар нақши муассир хоҳад бозид. Тибқи иттилои Шавкат Саидов, ёвари раиси Маҷлиси миллӣ дар палатаи болоии парлумони Тоҷикистон соли гузашта чунин гурўҳ таъсис дода шуд, ки онро Убайдулло Қурбонов, узви Маҷлиси миллӣ сарварӣ менамояд.