Тоҷикистон ниёзи кишварҳои ҳамҷаворро таъмин менамояд

Душанбе, 29 май.(АМИТ «Ховар», Марзия Саидова).-Дар Теҳрон ҷаласаи нўҳуми Комиссияи муштараки байниҳукуматии ҳамкориҳои иқтисодию тиҷоратии Тоҷикистону Эрон, ки муддати се рўз идома дошт, бо имзои Протоколи ниҳоии ҷаласа ба анҷом расид.  Аббос Баёнӣ, масъули бахши иқтисоду тиҷорати Сафорати Эрон дар Душанбе мегўяд, ки фаъолияти Комиссияи муштараки байниҳукуматии ҳамкориҳои иқтисодию тиҷоратӣ дар тавсеаи робитаҳои иқтисодии ҳар ду кишвар нақши барозанда дорад. Дар ҷаласаҳои Комиссияи мазкур, ки дар шаҳрҳои Душанбеву Теҳрон доир мегарданд, масъалаҳои муҳим, ки ба таҳкими ҳамкориҳои ҳар ду кишвар мусоидат менамоянд, мавриди баррасӣ қарор мегиранд ва онҳо дар оянда амалӣ мегарданд. Дар ҷаласаи нўҳум масъалаҳои марбут ба бахши энергетика,саноат, алоқа, тандурустӣ, кишоварзӣ ва илмию фарҳангӣ матраҳ гардиданд. Аббос Баёнӣ афзуд, ки алҳол дар Тоҷикистон дар радифи бахши давлатӣ бахши хусусии Эрон фаъол буда, 175 ширкати хусусии эронӣ фаъолияти худро дар бахшҳои мухталиф роҳандозӣ намудааст. Мавсуф афзуд, ки гардиши мол дар соли 2011 байни ҳар ду кишвар наздики 400 миллион долларро ташкил додааст, ки он аз густариши ҳамкориҳои иқтисодию тиҷоратӣ байни ҳар ду давлат шаҳодат медиҳад. Мавриди зикр аст, ки моҳи марти соли равон дар Душанбе сарони се кишвари форсизабон –Тоҷикистон, Афғонистон ва Эрон санади ҳусни тафоҳумро ба имзо расониданд, ки ҳадафаш рушди шабакаи коммуникатсионӣ ва сохтмони роҳу ҷодаҳо буда, дар радифи он бунёди қубурҳо барои интиқоли газу нафт аз Эрон ба Тоҷикистон ва интиқоли об аз Тоҷикистон ба Афғонистону Эрон дар назар аст. Бояд тазаккур дод, ки Тоҷикистон аз лиҳози захираҳои обию энергетикӣ дар минтақа мақоми хосса дорад.