Ватандорони беҳамтои мулкем

Суғд, 8 май. (АМИТ «Ховар», Мирзалӣ Амонов).-Таҷлили Рӯзи ҷавонони Тоҷикистон аз муҳимтарин падидаест, ки тақдири ҷавонони кишвар ва таъмини ҳаёти ояндасози онҳоро ифода мекунад. Дар вилояти Суғд «Як моҳи ҷавонӣ» таҳти унвони «Ватандорони беҳамтои мулкем» бо раҳпаймоии ҷашнӣ ва бо ҷалби беш аз 6000 нафар ҷавон аз шаҳри Хуҷанд оғоз гардид. Таҷлили Рӯзи ҷавонони Тоҷикистон бо баргузории чорабиниҳои муҳим дар сатҳи вилоят, аз қабили озмунҳои «Ҷуфти муносиб» байни оилаҳои ҷавон ва «Садои дил», ҳафтаи худидоракунӣ дар мақомоти иҷроияи вилоят бо ҷалби донишҷӯёни мактабҳои олӣ, маросими супоридани идрорпулии раиси вилоят ба донишҷӯёну аспирантони мактабҳои олии вилоят, маҳфили «Хушдилон ва ҳозирҷавобон», намоиш-озмунҳои ихтироъкорони ҷавону наврас, асарҳои рассомони ҷавон, мусобиқаҳои варзишии футболи хурд байни факултаҳои мактабҳои олӣ ва миёнаи махсус, дави миллӣ, аёдати ҷавонони маъюбу камбизоат, тӯи арӯсию домодӣ ва хатнасури 27 нафар кӯдак аз оилаҳои камбизоат пешбинӣ шудааст.