Жозе Моурино шартномаашро бо “Реал” тамдид кард
Душанбе, 23 май. ( АМИТ «Ховар», Аловиддин Бӯриев).- Сармураббии клуби футболи «Реал»- Мадрид Жозе Моурино шартномаи худро бо даста то 30 июни соли 2016 тамдид кард. Дар бораи шартҳои молиявӣ чизе гуфта нашудааст. Моурино соли 2010 ба дастаи «Реал» гузаштааст. Дар соли аввали фаъолияташ даста соҳиби Ҷоми Испания гардид. Соли 2011″Реал» тавонист баъди 6 сол марҳилаи аввали плей-оффи Лигаи чемпионҳоро паси сар кунад ва ба бозиҳои нимниҳоӣ роҳхат гирад. Дар мавсими 2011/12 «Реал» таҳти роҳбарии Моурино чемпиони Испания гардид. Моурино дар таърих чорумин мураббиест, ки дар чор кишвар унвони чемпиониро ба даст овардааст. Аз ин пештар ӯ бо «Порту» чемпиони Португалия, бо «Челси» чемпиони Англия ва бо «Интер» чемпиони Италия шуда буд.