Ҳайати ҶТ ба Покистон меравад

Душанбе, 22 июн. (АМИТ «Ховар», Покиза Маҳмадбекова). – 21 июн дар шаҳри Душанбе мулоқоти раиси Палатаи савдо ва саноати Тоҷикистон Шариф Саид бо сафири Покистон дар ҶТ Амҷад Ҳусейн Баркаталӣ Сайл баргузор гардид.Сафир дар ҷараёни мулоқот хабар дод, ки аз 4 то 7 октябри соли 2012 дар маркази тиҷоратии шаҳри Карочии Покистон Намоишгоҳи 7 – уми байналмилалии «ЭКСПО Покистон – 2012» баргузор мегардад ва хоҳиш намуд, ки ҳайати Тоҷикистон дар он иштирок кунад.Қобили зикр аст, ки соли гузашта дар ин намоишгоҳ 52 кишвар маҳсулоти худро ба маърази намоиш гузошта буд. Шариф Саид изҳор дошт, ки солҳои охир ҳамкории тиҷоратию иқтисодии байни ҳар ду кишвар босуръат рушду густариш меёбад. Раиси палата ҳамчунин хабар дод, ки бо палатаҳои шаҳрҳои Карочи, Лоҳур ва Исломобод созишномаҳои ҳамкорӣ имзо шудаанд. Мавсуф пешниҳод намуд, ки барои густариши минбаъдаи робитаҳои тиҷоратӣ дар Тоҷикистон намоишгоҳи Покистон доир карда шавад.Дар ин бора аз Палатаи савдо ва саноати ҷумҳурӣ ба АМИТ «Ховар» хабар доданд.