Ҳалокати ронанда аз беэҳтиётӣ

Душанбе, 19 июн. (АМИТ «Ховар», Мавҷуда Анварӣ). – Ронандаи автомашинаи тамғаи «Samand» бар асари як садамаи нақлиётӣ ба ҳалокат расид. Тибқи иттилои ВКД, рӯзи гузашта сарнишини сабукрави мазкур Азимхон Ғойибови 47-сола ҳангоми ҳаракат аз тарафи маҳаллаи Мирзобек ба самти кӯчаи Зебуниссои пойтахт дар рӯ ба рӯи нуқтаи фурӯши сӯзишворӣ бо сабабҳои номаълум ба қафои автомашинаи тамғаи «Centrifuge», ки ронандааш Ноил Азимбоев будааст, бармехӯрад. Дар натиҷа, ронандаи автомашинаи «Samand» Азимхон Ғойибов ҷароҳати вазнини ҷисмонӣ бардошта, дар ҷойи ҳодиса ба ҳалокат мерасад. Мусофирони автомашинаи мазкур Гулрухсор Қурбоноваи 29- сола ва Гулсуной Абдурозиқоваи 58-сола, сокинони ноҳияи Рӯдакӣ ҷароҳатҳои гуногуни ҷисмонӣ бардошта, дар беморхона бистарӣ шудаанд.