Ҳалокати шаҳрвандони Хитой дар садамаи нақлиётӣ

Душанбе, 11 июн. (АМИТ «Ховар», Мавҷуда Анварӣ). – Ронандаи автомашинаи тамғаи «Land-Cruiser» рақами давлатиаш АЕ 22-00 РТ 03 шаҳрванди Ҷумҳурии Халқии Хитой Ван Чан Тани 41-сола, директори Ҷамъияти дорои масъулияташ маҳдуди «Джунда» ҳангоми ҳаракат дар 48-ум километри роҳи мошингарди Мурғоб-Қулма аз ӯҳдаи идора намудани воситаи нақлиёт набаромада, ба тарафи канори роҳ чаппа мешавад, ки дар натиҷа худи ронанда ва мусофирони дохили автомашина, шаҳрвандони Ҷумҳурии Халқии Хитой Зоу Занг Вени -37 сола, Линг Вей Чани 52 сола ва Ху Дани 48 -сола дар ҷойи ҳодиса ҳалок мегарданд. Тавре ки дар сомонаи Вазорати корҳои дохилаи кишвар mvd.tj иттилоъ доданд, мусофири дигари автомашинаи мазкур шаҳрванд Ситамов Фаррух Тоҷиддиновичи-24 сола, сокини ноҳияи Ёвон, корманди ҶДММ «Джунда» зарари ҷисмонӣ бардошта, дар беморхона бистарӣ гардидааст.