Ҳамоиши таҷрибаи ташаббуси шаффофият

Душанбе, 7 июн.(АМИТ «Ховар», Музаффар Рустамов). -12 июни соли 2012 бо ибтикори барномаи «Ташаббуси шаффофият ва ҳисоботдиҳӣ»-и шӯъбаи Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон ва ҳамшарикии Иттифоқи созмонҳои ҷомеаи шаҳрвандии Тоҷикистон «Шаффофият барои рушд» дар Маркази тиҷоратии «Вафо»-и шаҳри Душанбе мизи мудаввар дар мавзӯи «Ҳамоиши таҷрибаи ташаббуси шаффофият ва ҳисоботдиҳии соҳаҳои истихроҷи Тоҷикистон» баргузор мегардад. Дар мизи мудаввар намояндаҳои сохторҳои давлатӣ, саноати истихроҷ ва ҷомеаи шаҳрвандӣ иштирок мекунанд. Дар чорабинӣ таҷрибаи ташаббуси шаффофият дар соҳаҳои истихроҷи Озарбойҷон, Қазоқистону Қирғизистон ва имконияти роҳандозии он дар Тоҷикистон баррасӣ мешавад.  Ҳамроҳшавии Тоҷикистон ба ин ташкилот барои беҳтар кардани шароити сармоягузорӣ таъсири мусбат дошта, обрӯи кишварро чун ҷонибдори шаффофият ва масъули гирифтани даромад ва харҷи самараноки он боло бурда, воридоти сармоягузории хориҷиро афзун мегардонад, ҷойҳои нави корӣ таъсис дода мешаванд ва барои табақаҳои муайяни аҳолӣ сарчашмаҳои нави даромад ба вуҷуд меоянд.