Б. Худоёров –раиси Кумитаи ММ МО ҶТ

Душанбе, 15 июн.(АМИТ “Ховар”, Марзия Саидова).- Собиқ вазири адлия, Бахтиёр Худоёров, ки алҳол Дастгоҳи иҷроияи Президенти Ҷумҳурии Тоҷикистонро роҳбарӣ менамояд ва 9 июн зимни баргузории интихоботи узви Маҷлиси миллӣ дар ҳавзаи интихоботии №4 Душанбе узви палатаи болоии парлумони мамлакат интихоб гардида буд, дар иҷлосияи нўҳуми Маҷлиси миллӣ бо қарори палатаи болоии парлумон раиси Кумитаи Маҷлиси миллии Маҷлиси Олии Ҷумҳурии Тоҷикистон оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонуният интихоб гардид. Қаблан ин Кумитаро Мамадшо Илолов раисӣ мекард. М. Илолов аз раисии Кумитаи мазкур бозхонд гардида, раиси Кумитаи Маҷлиси миллии Маҷлиси Олии Ҷумҳурии Тоҷикистон оид ба ҳамоҳангсозии фаъолияти Маҷлиси миллӣ бо Маҷлиси намояндагон, ҳокимияти иҷроия, иттиҳодияҳои ҷамъиятӣ, воситаҳои ахбори омма ва робитаҳои байнипарлумонӣ интихоб гардид. Иброҳим Абдуллоев бошад муовини М. Илолов интихоб шуд. Палатаи болоии парлумони Тоҷикистон-Маҷлиси миллӣ 33 аъзо дошта, 25 аъзои он аз ҷониби вакилони Маҷлисҳои маҳаллии вакилони халқи Вилояти Мухтори Кўҳистони Бадахшон, Суғду Хатлон, шаҳри Душанбе ва навоҳии тобеи марказ интихоб гардида, 8 аъзои дигар бо Фармони Президенти ҷумҳурӣ узви Маҷлиси миллӣ таъин мешаванд. Собиқ Президенти Тоҷикистон Қаҳҳор Маҳкамов узви доимии Маҷлиси миллӣ мебошад. Шахсе, ки дорои маълумоти олист ва синнаш ба 35 даромадааст, узви Маҷлиси миллӣ шуда метавонад.