Баррасии ҳамкориҳо бо TICA

Душанбе, 22 июн. (АМИТ «Ховар», Покиза Маҳмадбекова). — Имрӯз дар Вазорати рушди иқтисод ва савдо вохӯрии Вазир, Шариф Раҳимзода бо Ҳамоҳангсози барномаи Раёсати Туркӣ оид ба рушд ва ҳамкориҳои байналхалқӣ, ҷаноби Фатеҳ Йилмаз доир гардид.  Ба мухбири АМИТ «Ховар» аз хадамоти матбуотии вазорати мазкур иттилоъ доданд, ки тақвияти рушди муносибатҳои дуҷониба, омода намудани мутахассисон дар соҳаҳои мухталиф, аз ҷумла хизматрасонии соҳаи туризм ва рафти иҷрои корҳои вобаста ба лоиҳаҳои амалигардида дар Ҷумҳурии Тоҷикистон дар мулоқоти Ш. Раҳимзода бо ҷаноби Ф.Йилмаз аз мавзӯъҳои калидӣ маҳсуб гардиданд. Мавриди зикр аст, ки фаъолияти TICA дар Ҷумҳурии Тоҷикистон асосан аз ҳамкориҳои техникӣ дар соҳаҳои мухталиф иборат аст. Намояндагии ин созмон ҷараёни расондани кӯмаки техникиро ҷиҳати татбиқи лоиҳаҳо дар соҳаҳои иқтисод, инфрасохтор, фарҳанг, маориф, баланд бардоштани тахассус ва ғайра мунтазам таҳти назорат қарор медиҳад. Бо мақсади мусоидат ба рушди ҷумҳурӣ то имрӯз аз ҷониби Туркия тавассути TICA кӯмаки техникӣ ба маблағи бештар аз 7 миллион доллари ИМА расонида шуд. Дар интиҳои мулоқот ҷонибҳо атрофи нақшаю барномаҳои дар оянда амалишаванда мубодилаи афкор намуданд.