Баррасии ислоҳоти навини самти соҳибкорӣ

Душанбе, 1 июн. (АМИТ «Ховар», Бекназари Абӯбакр). — 31 май дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон доир ба муҳокимаи лоиҳаи варианти ибтидоии Қонунҳои Ҷумҳурии Тоҷикистон «Дар бораи ҳимоя ва дастгирии давлатии соҳибкорӣ» ва «Дар бораи санҷишҳои фаъолияти субъектҳои соҳибкорӣ» мизи мудаввар баргузор гардид.Чорабинӣ аз ҷониби Кумитаи давлатии сармоягузорӣ ва идораи амволи давлатӣ ташкил шуда, дар он зиёда аз 70 нафар соҳибкор роҳбарон ва намояндагони ширкатҳои ватанӣ ва ассотсиатсияҳои соҳибкорони ҷумҳурӣ, инчунин намояндагони мақомоти давлатии санҷишӣ иштирок карданд.Дар ҷараёни мизи мудаввар аз ҷониби намояндагони Кумита лоиҳаҳои дар боло зикршуда бо назардошти қайди фарқияту тағйироти он дар муносибат ба санадҳои амалкунандаи самтҳои мазкур муаррифӣ гашта, ҳадафу моҳияти қабули санадҳои мазкур равшан карда шуданд.Bслоҳоти мазкур дар асоси дастуру супоришҳои Президенти ҶТ, ки дар Паёми худ ба Маҷлиси Олӣ дар соли 2012 баён гардид, инчунин аз доираи дигар барномаҳои рушди иқтисодиёт ва стратегияҳои ҷумҳурӣ, бо назардошти таъмини сиёсати дастгирии давлатии соҳибкорӣ ва пешбурди фаъолияти он дар мамлакат бар меояд.