Баррасии масоили мушкилоти истеъмоли нашъа
Душанбе, 15 июн. (АМИТ «Ховар», Мавҷуда Анварӣ). — Имрӯз дар шаҳри Душанбе бахшида ба мавзӯи масоили мушкилоти истеъмоли нашъа ва паҳншавии бемориҳои сироятӣ дар Тоҷикистон мизи мудаввар баргузор шуд. Мизи гирд аз ҷониби Агентии назорати маводи нашъаовари назди президенти Тоҷикистон дар ҳамдастӣ бо созмони башардӯстонаи «СПИД Фонд Шарқ-Ғарб» (AIDS Foundation East-West, AFEW)-и Ҳолланд созмон дода шуд.Чорабинӣ ба муносибати Рӯзи байналмилалии мубориза бо сӯйистеъмоли воситаҳои нашъаовар ва муомилоти ғайриқонунии он, ки ҳамасола дар саросари ҷаҳон 26-уми июн таҷлил мегардад, доир гардид. Мизи мудаввар дар чаҳорчӯбаи як лоиҳае, ки аз ҷониби Вазорати корҳои хориҷии Нидерланд маблағгузорӣ мешавад, баргузор шуд.Дар ҷараёни кори он дар бораи вазъи мубориза бо маводи мухаддир дар Тоҷикистон, ҳолати эпидемиологӣ оид ба ВИЧ-ангезанда миёни истеъмолгарони нашъа ва натоиҷи таҳқиқот дар бораи баҳодиҳӣ ба эҳтиёҷот ва талаботи истеъмолгарони воситаҳои нашъаовар маълумот пешниҳод гардид. Ҳамчунин ба таври мухтасар киноверсияи журналистони аксбардори ҳолландӣ дар бораи хатсайри ҳероини афғонӣ дар муддати ду даҳсолаи ахир низ пешкаш шуд.