Бинои нав барои шӯъбачаи кофтукови ҷиноии шаҳри Ваҳдат

Душанбе, 20 июня. (АМИТ «Ховар», Лутфия Эшонкулова).-Барои кормандони милитсияи мақомоти Вазорати корҳои дохилӣ дар шаҳри Ваҳдат боз як бинои нав, ки бо тарзи замонавӣ сохта шудааст, ба истифода дода шуд. Тавре сомонаи расмии ВКД хабар медиҳад, бо ташаббус ва дастгирии вазири корҳои дохилӣ генерал-лейтенанти милитсия Рамазон Раҳимов бинои нав бо таҷҳизоти замонавӣ муҷаҳҳаз гардонида шуда, барои кормандони бахши кофтукови ҷиноии мақомоти Вазорати корҳои дохилии шаҳри Ваҳдат пешбинӣ гардидааст.Дар маросими кушодашавии бино вазири корҳои дохилӣ суханронӣ намуда, кормандонро барои хизмати поквиҷдонона ба давлату миллат, баланд бардоштани малакаи дониш, саривақт пешгириву ошкор намудани ҷиноятҳо ҳидоят намуда, ҷиҳати ба дастовардҳои нав ба нав ноил гардиданашон барору комёбиҳо таманно намуд. Пас аз дида баромадани бинои нав роҳбарияти ВКД аз рафти таъмири дигар бинои шӯъбаи ВКД дар шаҳри Ваҳдат, ки ҷараён дорад дидан намуда, ба кормандон ва сохтмончиён изҳори миннатдорӣ намуд.