Дипломати хориҷӣ: «Ба миллати тоҷик назари нек дорам»

Душанбе, 19 июн.(АМИТ «Ховар», Марзия Саидова).-«Бо таъин шудани ҷаноби Гасанов ба симмати Сафири фавқулодда ва мухтори Озарбойҷон дар Ҷумҳурии Тоҷикистон раванди муносиботи Душанбе ва Боку ба марҳилаи тоза ворид гардида, тамоюли рў ба рушдро касб мекунад». Ин нуктаро Шукурҷон Зуҳуров, раиси Маҷлиси намояндагони Маҷлиси Олии ҷумҳурӣ 19 июн зимни мулоқоташ бо Аббосалӣ Каром оглу Гасанов, Сафири фавқулодда ва мухтори Ҷумҳурии Озарбойҷон дар Ҷумҳурии Тоҷикистон иброз дошт.  Муҳаммадато Султонов, котиби матбуотии Маҷлиси намояндагон иттилоъ дод, ки мусоҳибон масъалаи тақвияти ҳамкориҳои Тоҷикистону Озарбойҷон дар бахши робитаҳои байнипарлумонӣ, сиёсию иқтисодӣ, энергетика, кишоварзӣ, фарҳангӣ ва соири мавзуоти мавриди таваҷҷўҳро баррасӣ намуданд. Раиси парлумони Тоҷикистон дипломати озариро бобати таъиншуданаш ба ҳайси Сафири Озарбойҷон дар Тоҷикистон сидқан табрик намуда, ба вай ва кормандони сафорати ин кишвар барои фаъолияти минбаъдаи дипломатиашон ва амалӣ намудани барномаҳои дуҷонибаи Тоҷикистону Озарбойҷон комёбиҳо орзу намуд. Ш. Зуҳуров таъкид кард, ки миёни Тоҷикистон ва Озарбойҷон фазои мусоиди ҳуқуқӣ ва сармоягузорӣ ҷиҳати таҳкими ҳамкориҳо дар тамоми соҳаҳо вуҷуд дорад ва парлумони Тоҷикистон сайъ менамояд, ки фазои аз ин ҳам беҳтари ҳуқуқиро барои тавсеаи муносиботи дуҷониба фароҳам орад.Дар навбати худ дипломати озарӣ Аббосалӣ Каром оглу Гасанов изҳор дошт, ки ў ба мардум ва миллати тоҷик назари нек дорад ва ба ҳайси сафири нави кишвараш дар Душанбе аз тамоми имконот ва маҳорату дониши худ барои таҳкими ҳамкориҳои Озарбойҷон бо Тоҷикистон истифода хоҳад кард.