Ду ҳазору 110 ҳолати қонуншиканӣ ошкор шуд

Душанбе, 20 июн. (АМИТ «Ховар», Лаззат Диловарзод).- Масъулини Кумитаи заминсозии вилояти Хатлон дар давоми 5 моҳи аввали соли ҷорӣ 2 ҳазору 110 ҳолати қонуншикании шаҳрвандони вилоятро нисбат ба Кодекси замини Тоҷикистон ба қайд гирифтаанд.Ба иттилои манбаъ, кормандони Кумитаи заминсозии вилоят дар бораи қонуншикании шаҳрвандон вобаста ба худсарона ишғол намудани қитъаҳои замин 850 протоколи маъмурӣ ба маблағи 264 ҳазору 680 сомонӣ тартиб доданд, ки аз он маблағи 176 ҳазору 964 сомонӣ ба буҷети давлат ворид карда шудааст. Дар ин давра нозирони кумитаи мазкур 332 ҳодисаи худсарона азхуд кардани майдони 30 гектар заминро ошкор намуданд.Нозирони кумита барои бартараф намудани ин қонуншиканӣ 270 таъинот ва ба маблағи 67 ҳазор сомонӣ протоколи маъмурӣ тартиб доданд. Аз тарафи роҳбарон ва мутахассисони Кумитаи заминсозии вилоят нисбат ба 58 нафар қонуншикан, ки дар баргардонидани қитъаҳои замини азхудшуда саркашӣ намудаанд, маводи зарурӣ таҳия шуда, барои чораҷӯӣ ба прокуратура пешниҳод гардидааст.