Ду сохтори қудратӣ аз пардохти гумрукӣ озод гардиданд

Душанбе, 13 июн.(АМИТ «Ховар», Марзия Саидова).- Вазорати мудофиаи Ҷумҳурии Тоҷикистон ва Гвардияи миллии ҷумҳурӣ барои воридоти техникаи ҳарбӣ ва агрегатҳои асосӣ, қисмҳои эҳтиётӣ, яроқ, муҳимоти ҷангӣ, воситаҳои махсус барои таъмири чархболҳо ва дигар лавозимоти муҳими ҳарбӣ аз пардохти андоз аз арзиши иловашуда ва боҷи гумрукӣ озод шуданд. Дар ин хусус 13 июн вакилони палатаи поёнии парлумони Тоҷикистон –Маҷлиси намояндагон дар ҷаласаи навбатии иҷлосияи сеюм ба лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2012» иловаҳо ворид намуданд. Сафаралӣ Наҷмиддинов, вазири молияи кишвар зимни тавзеҳи масъалаи мазкур гуфт, ки ин тадбир бо мақсади иваз намудани таҷҳизоти кўҳна бо таҷҳизоти муосир, баланд бардоштани сатҳи хизмати ҳарбӣ ва таъмини эҳтиёҷоти сохторҳои қудратии кишвар бо лавозимоти махсуси ҳарбӣ андешида шудааст. Ин имкон медиҳад, ки таъмини вазифаҳои ба зиммаи кормандони Вазорати дифоъ ва Гвардияи миллии ҷумҳурӣ гузошташударо боз ҳам тақвият бахшанд. Аз ин рў Ҳукумати Ҷумҳурии Тоҷикистон аҳамияти муҳим доштани масъалаи мазкурро ба инобат гирифта, озод намудани воридоти таҷҳизот ва техникаҳои низомиро аз пардохти гумрукӣ ба баррасии парлумон ироа намудааст, афзуд вазири молияи ҷумҳурӣ.15.28.