Э. Раҳмон дар 7 ҳамоиши Конфронси «Рио+20» иштирок ва суханронӣ мекунад

Душанбе, 20 июн. (АМИТ «Ховар»). — Тайи се рӯзи кори Конфронси Созмони Милали Муттаҳид оид ба рушди устувор дар сатҳи олӣ, ки аз 20-ум то 22-юми июн баргузор мегардад, иштирок ва суханронии Сарвари давлати Тоҷикистон Эмомалӣ Раҳмон дар 7 ҳамоиши он дар назар аст. Хотиррасон бояд намуд, ки ҳадафи асосии ин конфронс ба мувофиқа расондани Ҳадафҳои Рушди Устувор мебошад, ки аз соли 2015 ба баъд ҷойгузини Ҳадафҳои Рушди Ҳазорсола хоҳанд буд. Тавре таъкид мегардад, асоси ин ҳадафҳоро бояд «иқтисодиёти сабз», ё худ иқтисодиёти аз ҷиҳати экологӣ безарар ташкил диҳад. Ба иттилои созмондиҳандагони конфронс, ин ҳамоиш бо иштироки роҳбарони давлатҳо ё ҳукуматҳои 135 кишвари ҷаҳон, намояндагони воломақоми созмонҳои минтақавию ҷаҳонӣ ва коршиносони байналмилалӣ ҷараён мегирад.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.