EURO-2012: натиҷаи ғайричашмдошт

Душанбе, 11 июн. ( АМИТ «Ховар», Аловиддин Бӯриев).- Инак рӯзи сеюми бозиҳо дар чемпионати Аврупо доир ба футбол паси сар шуд. Натиҷаи ғайричашмдошт дар силсилаи вохӯриҳо алҳол дар бозии байни дастаҳои мунтахаби Дания ва Ҳоланд ба қайд гирифта шуд. Футболбозони даниягӣ дар баробари ситораҳои футболи ҷаҳон, чун Робен, Ван Перси, Снайдер ва дигарон бозии аҳлона нишон дода, бо натиҷаи 1 бар 0 ғалаба карданд. Голи задаи Микаэл Крон Дели тақдири бозиро ҳал кард. Дар ин гурӯҳ футболбозони Олмон бо ҳисоби 1 бар 0 дастаи мунтахаби Португалияро мағлуб намуданд. Ягона голро Марио Гомес ба нишон расонд. Дар гурӯҳи «С», ки онро гурӯҳи сангин ва марг ном мебаранд, дастаҳои Испания ва Италияро дар бозии аввалин рӯ ба рӯи ҳам овард. Бозӣ хеле пуршиддат гузашта, бо натиҷаи 1 бар 1 мусовӣ ба поён расид. Ҳисоб дар дақиқаи 60 аз ҷониби Ди Натале, ки чанде пеш ба майдон омада буд, боз шуд. Баъди се дақиқа испаниягиҳо тавассути голи задаи Фабрегас ҳисобро мусовӣ карданд. Дар ин гурӯҳ футболбозони Хорватия бо натиҷаи 3 бар 1 Ирландияро шикаст доданд. Ду голро дар ин вохӯрӣ Марио Маҷукич ба самар расонид.